Тэрбээр 2025 оны аравдугаар сарын 27-ны өдөр Океани бүсийн хамгийн өндөр цэг болох 4,884 метр өндөр Пунчак Жаяа оргилд гарснаар дэлхийн долоон тивийн ноён оргилд авирсан Монголын хоёр дахь “Seven Summiteer” болсон юм. Түүний сүүлчийн авиралт “14 Peaks Expedition” багийн бүрэлдэхүүнд амжилттай явагджээ.
15 жилийн тууштай замнал
Ч.Ариунзул 2010 оноос уулын спортоор тууштай хичээллэж, Монголын мөнх цаст уулс болон дэлхийн өндөр оргилуудад шат дараатайгаар авирч ирсэн.
4000 метрийн оргилоос эхэлсэн түүний замнал 5000, 6000, 7000, улмаар 8000 метрээс дээш өндөрт үргэлжилж, нийт 15 жилийн хөдөлмөр, бэлтгэл, тэсвэр хатуужлын дараа дэлхийн долоон ноён оргилыг бүрэн дуусгасан түүхэн амжилтаар өндөрлөсөн юм.
Түүний “Seven Summits” замнал:
| Тив | Оргил | Өндөр | Оргилд гарсан огноо |
| --- | --- | --- | --- |
| Африк | Килиманжаро | 5,895 м | 2013.10.29 |
| Европ | Эльбрус | 5,642 м | 2014.09.17 |
| Өмнөд Америк | Аконкагуа | 6,962 м | 2015.01.15 |
| Хойд Америк | Денали | 6,190 м | 2019.05.29 |
| Антарктид | Винсон Массив | 4,892 м | 2019.12.25 |
| Ази | Эверест | 8,848.86 м | 2025.05.19 |
| Океани | Пунчак Жаяа | 4,884 м | 2025.10.27 |
Дэлхийн дээвэрт хүрсэн 17 дахь Монгол уулчин
2025 оны тавдугаар сарын 19-ний өглөө Ч.Ариунзул дэлхийн хамгийн өндөр цэг болох Эверестийн оргилд амжилттай гарсан.
Ингэснээр тэрбээр Эверестийн оргилд хүрсэн Монголын 17 дахь уулчин болж, Монгол Улсын төрийн далбааг далайн түвшнээс дээш 8,848.86 метрийн өндөрт мандуулсан юм.
Энэхүү амжилтын үнэ цэн нь зөвхөн оргилд хүрсэн мөчөөр хэмжигдэхгүй. Ч.Ариунзул 2022 онд Эверестэд анхны оролдлогоо хийхдээ 6,900 метрийн өндөрт хүрсэн ч цаг агаар, биеийн нөхцөл болон аюулгүй байдлыг бодитоор үнэлэн буцах шийдвэр гаргаж байжээ.
Тэрбээр гурван жилийн дараа илүү сайн бэлтгэл, туршлагатайгаар эргэн ирж, 2025 онд зорилгодоо амжилттай хүрсэн байна.
**“Амжилт гэдэг заавал оргилд гарахыг хэлдэггүй. Амьд үлдэж, дахин оролдох боломжоо хадгалахыг хэлдэг.”**
Энэхүү зарчим нь түүний уулын спортын замналаас гадна бизнесийн удирдлага, шийдвэр гаргалт, амьдралын хандлагад ч чухал байр суурь эзэлдэг.
Оргилд хүрэхээс илүү үнэ цэнтэй сургамж
Долоон тивийн ноён оргилд авирна гэдэг нь зөвхөн биеийн хүч, тэсвэр хатуужлыг сорьсон аялал биш юм. Өндөр уулын авиралт бүр олон сарын бие бялдар, сэтгэл зүй, санхүү, тоног төхөөрөмж болон маршрутын нарийн бэлтгэл шаарддаг.
Аюулгүй байдлыг нэн тэргүүнд тавих, нөхцөл байдлыг бодитоор үнэлэх, шаардлагатай үед зогсож, дахин эхлэх чадвар нь ууланд төдийгүй байгууллагын удирдлагад ч ижил үнэ цэнтэй зарчим болдог.
Ч.Ариунзул уулын спорт түүнд дараах үнэт зүйлсийг сургасан хэмээн онцолдог. Үүнд:
- зорилгодоо үнэнч байх;
- урт хугацаанд тууштай ажиллах;
- эрсдэлийг бодитоор үнэлэх;
- зөв цагт зөв шийдвэр гаргах;
- өөрийн бие, сэтгэл болон орчноо сонсох;
- ажил, гэр бүл, хувь хүний хөгжлийн тэнцвэрийг хадгалах.
Түүний тодорхойлсноор уулын спортод хамгийн хурдан хүн бус, олон хүчин зүйлийг зөв тэнцвэржүүлж чадсан хүн оргилд хүрдэг. Энэ зарчим нь тогтвортой бизнес, урт хугацааны манлайлалд ч мөн адил үйлчилдэг.
Үүсгэн байгуулагчаас манлайлагч хүртэл
Ч.Ариунзул 2002 онд Амуулай Группийн суурийг тавьж, Монголын хэрэглэгчдэд чанартай бүтээгдэхүүн, үйлчилгээг хүргэх бизнесийн замналаа эхлүүлсэн.
Тэрбээр бизнес эрхлэгч, дөрвөн хүүхдийн ээж, усан будгийн зураач, уулчин гэсэн олон талт амьдралыг хослуулан авч явдаг бөгөөд өөрийн туршлагаараа амьдралын тэнцвэр, тасралтгүй хөгжил болон үйлдлээрээ манлайлахын үнэ цэнийг харуулж байна.
Амуулай Группийн хамт олон түүний энэхүү амжилтыг зөвхөн нэг хүний спортын ялалт бус, тодорхой зорилго, олон жилийн тууштай хөдөлмөр, сахилга бат, итгэл үнэмшлийн үр дүн хэмээн хүндэтгэн хүлээн авч байна.
Нэг оргилоос дараагийн оргил руу
Дэлхийн долоон ноён оргилыг бүрэн дуусгасан Ч.Ариунзулын замнал бидэнд амжилт үргэлж шулуун замаар ирдэггүйг харууллаа.
Зарим үед урагшлах, зарим үед зогсох, шаардлагатай бол буцах, дараа нь илүү бэлтгэлтэйгээр дахин эхлэх нь зорилгоосоо ухарсан хэрэг биш юм. Харин алсын хараатай, хариуцлагатай, тогтвортой амжилтын үндэс болдог.
15 жилийн турш зорилгодоо үнэнч байж, дэлхийн долоон тивийн ноён оргилд Монгол Улсынхаа далбааг мандуулсан Амуулай Группийн үүсгэн байгуулагч, Ерөнхий захирал Ч.Ариунзулд нийт хамт олон, харилцагч, түншүүдийнхээ нэрийн өмнөөс халуун баяр хүргэе.